بأمارة أيه يا حزب النور؟! ... د . اوعاد الدسوقي

عندي كلمتين نفسي أقولهم بالبلدي الفصيح و العامي الصريح و أجري علي الله لكل من:
1: حزب النور
عايزة أعرف بأمارة أيه تتشرط و تتني و تنفرد علينا ؟ ده أحنا لا شفنا منك حاجة قدمتها لمصر تشفع لـ عجرفتك ولا سمعنا عن خدمات عملتها للشعب تخلينا نتحمل غلاستك كل اللي أخدناه منك غزوة صناديق علي شوية فتاوى تكفيرية و آراء سلبية رجعية و عدم احترام السلام الوطني و تحقير للمرأة و اضطهاد الأقباط لدرجة تحريم مد الأيادي بالسلام و التهنئة , تمرد و قطعتها, 30 يونيو و أنكرتها يبقي بأمارة أيه تتكلم باسم الثورة و أنت حزب أصلا بلا تاريخ نضالي علاقته بالثورة لا تختلف عن علاقة عم عبده البواب باللغة اليابانية !! بأمارة أيه تهدد و تتوعد وتفرض رأيك و تقول فيها لا خفيها.. أيه سمعني كده بتقول عشان لك مؤيدين و أتباع و تقدر تحشد بـ " لا" ضد الدستور وضد أي قرار مش علي هواك .. لا ده كان زمان و جبر حضرتك لا بقي عندك أرضية في الشارع ولا حد أصلا بقي طايقك ولا طيق أهلك وعشيرتك أنزل و أمشي في الشارع وأنت تعرف حجمك الحقيقي وقد أيه الناس أتخنقت منك و من عمايلك و من كل شئ يرمز لك .. أما قصة الحشد اللي كنت بتستخدمها فزاعة راحت عليك و بقي فيه اللي يقدر يحشد 33 مليون في يوم و نص ومش علي طريقتك يعني لا بيحمل أتباعه في أتوبيسات ويدفع لهم فلوس وجبات لكن الناس بتنزل لتلبية النداء من باب الثقة و الاحترام لأن الداعي هو الصادق الأمين علي وطنه وشعبه..الشاهد في الموضوع عايزة أقولك أحمد ربك و بوس أيدك وش و ضهر أن فيه مسئولين لسه باقين علي انك تشارك في الحياة السياسية و أوعي تفكر نفسك كبير لان الشعب أسقط ودهس اللي أكبر واقوي منك في التنظيم و الحشد.

2: الرئاسة و الحكومة :
كفاية طبطبة و دلع مع تيارات التأسلم السياسي لان بصراحة معدش في مرارة تتحمل أسلوبكم اللي كله حنية و طيبة , مش فاهمة ليه الضعف معاهم ؟ ليكون ماسكين عليكم " ذله " صور أو CD مثلا من بتوع "مرتضى منصور" قولوا قولوا متخافوش أحنا برضو شعبكم ستر وغطى عليكم!! شوية جد بقي بصى يا حكومة باختصار يا تكوني حكومة ثورة بجد وعلي قدر المسؤولية لا تاخدى جنب و تسيبى البلد للي يعرف يديرها وبعد كده أية حكاية كلمة" المصالحة" دي اللي بتتكرر علي لسان " الببلاوى" أكثر ما كرر "مرسي" كلمة الشرعية, و يا تري مصالحة أيه ومع مين؟ مع اللي قتل الجنود ولا اللي عذب المواطنين ولا اللي فخخ وفجر سيارة في موكب الوزير!! ومين أساسا هيسمح بالتصالح مع من خان وقتل !! أنتم هنا عشان حل قضايا المواطن و توفير احتياجاته و إعادة الأمن وبدل ما تتعبوا نفسكم في مسرحية المصالحة الهزلية ركزوا في إقرار قانون الحد الأدنى و الأقصى للأجور أعتقد أن المطلب ده يهم المواطن أكثر من المصالحة مع جماعة إرهابية.

3: دكتور زياد بهاء الدين
والله العظيم .. ثلاثة بالله العظيم حضرتك وزير للتعاون الدولي ونائب رئيس الوزراء للشئون الاقتصادية مش السياسية!! يعني شغلت سيادتك أنك تاخد شنطتك و تلف العالم توقع اتفاقية تعاون هنا أو تفتح طريق للاستثمار هناك , تقدم خطة اقتصادية تنقذ بيها الأوضاع المتردية تحصل لنا علي معونة أو قرض زي ما كانت بتعمل العملاقة دكتورة "فايزة أبو النجا .. آه والله هو ده بالضبط دورك في الحكومة اللي بتاخد عليه أجر و راتب من جيوبنا عشان تعدل حال البلد المايل اقتصاديا مش تقعد قعده عرب و تصالح إخوانيا!

4:لجنة الـ 50
مصر لن تستقر إلا بحظر الأحزاب علي أساس ديني و كمان حل جميع الأحزاب الدينية الموجودة بالفعل لأنها بمثابة رأس الأفعى , يا سادة ليس من المنطقي أبدا أن ثورة 30 يونيو العظيمة التي قامت بالأساس ضد الفاشية الدينية لجماعة الإخوان وحزب النور وما علي شاكلتهم لا تحقق أهم هدف من أهدافها وهو القضاء علي التميز الديني سواء بين المسلمين و المسيحيين أو بين المسلمين بعضهم البعض, صيغوا مواد تحمي الإرادة الشعبية و تفعل شعار الدين لله و الوطن للجميع للقضاء علي رؤس الفتنة و الضلال التي تبتز الشعب باسم الدين .. مصر لم تعد تحتمل التشكيك في هويتها الدينية أو أن يدعي مغرض أنه صاحب الإسلام الصحيح وباقي الشعب كفره نحن دولة عرفت الله و التوحيد منذ عهد إخناتون و قبل نزول الديانات, و ليس من المعقول إن العالم يغزو الفضاء و تظل مصر حبيسة فتاوى إرضاع الكبير و بول البعير .. مستقبل مصر أمانة بين أيديكم فلا تخذلوها أو تخذلونا.