بالمشرمحي / حرامي ..معارض جديد ..؟!! ... خليل صارم

شو يابو يوسف ..شايفك معصب ..؟ .
- إي والله ..شي بيعصب .. بصراحة حتى الهوا صار بيخليك تعصب بهالبلد .
.. أف..أف..أف خير انشالله .. شو..فيه جديد .؟!
- ولك ياعمي قول ..شو فيه مش جديد .!! العمى كل يوم فيلم غير شكل ..وآخرتها مع هالفاسدين ولاد الكلب .. بس بدي إعرف مين عم يغطيهم ويطول إلهم الحبل ع الآخر حتى ماعاد يوقفوا جرش وقرط بهالبلد والناس ..؟ .
.. مش أنا يابو يوسف الله وكيلك أنا مادخلني ..؟
- هلق بلا مسخرة ما سمعت بقصة آخر حرامي طرطوسي ..؟!!
.. هات لنشوف ..؟
- هلق معقول هالكلام .. بدك تقنعني إنك مابتعرف ..؟
.. من وين بدي إعرف يابو يوسف إذا ماعم بطلع برا البيت إلا إذا كان السبب قاهر وضروري جدا ً .. صرنا منخاف إذا طلعنا ع الشارع وعطسنا يركضوا الفاسدين ويكمشونا .. قال ياغالي .. مهتمين بسلامة البلد والوطن .. بيعملوا من الحبة قبة حتى يغطوا ع القبة الحقيقية . !!
- هلق صحيح مابتعرف بآخر حرامي اللي شفط أموال الناس وضحك على أمين صندوق المصرف اللي مصاب بالسرطان وأغراه حتى يسحب حوالي نصف مليون دولار ويعطيه إياها .. قال بدو يرد له أرباح كبيرة بوقت قصير بعد مابلعو الطعم عن طريق مليون ونصف ليرة سورية وأعطاه أرباح تلاتين ألف ليرة بالشهر الواحد .. وكمان طلع ساحب أموال من مصارف تانية وجامع أموال من شوية تيوس طماعين لسه بيوقعوا بنفس الجورة اللي مابيوقع فيها الحمير .. قام صاحبنا الحرامي تاجر السيارات جمعها كلها وفركها برا البلد .
... صدقني يابو يوسف ماسمعت .. كمل ..كمل وحياة ابوك ..حلوة هالقصة .
- صاحبنا إلو زمان عم يتشبرق ويدلل حالو على حساب الناس وماحدا انتبه عليه .؟ ولك المصيبة ماحدا سأل من وين مع أنو بالأصل مفلس ومافي بالحال شي .
... صحيح والله ..هون السر .. كيف بتتكرر هالقصص .. ؟!!
- بسيطة ياخال .. لما الأخ كان عم يتشبرق ويدلل بقرتو متل دعاية الزبدة الدانماركية .. وبقرتو أو بقراتو ياحبيبنا .. كل أصحاب العلاقة ..؟ ومعلومك مين أصحاب العلاقة ..مابدنا نحكي خليها لذكاء اللي عم يقرا ويسمع ..؟ هيدول بس يشموا ريحة العملة بيتبنجوا وبتتعطل عقولهم بيقوموا يفتحو كل أبوابهم ع الأخير وبعدها .. عدي ومر ياشاطر ..!! يعني بصراحة بس تصير توزع هدايا وتعمل حفلات .. وعلى دبر لي كام ليرة وهاي هدية لعيد ميلاد الهانم وعيد ميلاد البيبي وهاي كام ليرة دهب خبيهم ليومك اللعين على اعتبار أنو الذهب ..ذهب معلومك . . وعلى هيك كان صاحبنا عم يدلل ويتدلل .. وهيك قرأ على حالو البسيبسة وانعمت العيون عنو .
... هلق هالحرامي شو كان يشتغل يابو يوسف .
- كان تاجر وسمسار سيارات ياغالي ( غرق ابو يوسف فجأة بنوبة ضحك ) اتبعها بعطس وشخر ونخر حتى كاد أن يختنق .ثم تابع سائلا ً .. هلق ياجار ماسمعت بآخر نكته .. ؟!
... لا والله ..هات لنشوف ..؟
- أي اسمع لكااان .. قال فيه واحد أنيق ملمع زيادة عن اللزوم تقدم لطلب جواز سفر .. ولما وصلت البيانات لخانة المهنة .. سأله موظف الجوازات .. شو المهنة يا أخينا .
فرد بدون تردد سجلها / قواد / .!! وقف الموظف حائرا ً .. وقال له مؤنبا ً .. عيب ياأخ عيب عليك مابتستحي ..وهيدي مهنة بتتسجل بجواز السفر .؟؟
رد المراجع .. هاي مهنتي ومهنة أبي من قبلي .!!
طبعا ً رفض الموظف وبعد جدل طويل وإصرار صاحب العلاقة .. أخذه الموظف من يده ودخل به على رئيسه .بعد أن روى القصة
سأله رئيس الدائرة .. ما عجبك تلاقي مهنة غيرها .؟
أجاب المراجع ببرود وإصرار..هذه مهنتي . ولما عجز رئيس الدائرة عن اقناعه بتغيير رأيه .. قال للموظف سجل المهنة يابني / سمسار سيارات / على اعتبار أنه لايوجد في سجلاتنا متل هذه المهنة والسمسار هي الأقرب .
- شو قصدك من هالنكتة يابو يوسف .؟!! رد بو يوسف بانفعال هلق بدك تأولها وتدخلنا بالزواريب المعتمة وتوصلنا على اللي عم بيبضوا أموال منهوبة عن طريق سمسرة السيارات والعقارات كمان .... لفها ياجار الله يخليك . . ويمكن إذا مد الحديث معنا نوصل لعند اللي بيكمشوا متعاطي المخدرات ومابيدوروا ع الموزع والبائع والتاجر وبينقطع الخيط فجأة.. ويمكن يكون نفس المخبر هو التاجر أو الموزع بعينو . وهيدي مش حمرنة .. هيدي فيها إن وأخواتها وبعدها بتصير كان وأخواتها .
.. أيوه .. المهم يابو يوسف شو صار بعدين .؟
- همهم بو يوسف وقال .. صاحبنا بليلة معتمة أخد عائلته وراح ع الأردن وهونيك ترك سيارته ع الحدود وتابع ماشيا ً إلى الجانب الأردني ومن الأردن الله أعلم وين بدها تكون الوجهة الأخيرة .. وبكرا صاحبنا بيعمل معارض سياسي وبيبلش يهاجم البلد والنظام . . و بالتأكيد معو كام مليون دولار يعني وين ماراح بياخد إقامة وجنسية وبيشتغل بالسياسة على أساس أنه كان مضطهد ببلده وبيبلش يعمل مقابلات صحفية وتلفزيونية ويعطينا محاضرات بالوطنية ويبكي ع الحرية وديمقراطية الكوكا والدراغ المقرمشة بالشطه .. بقى عرفت نوعية هالمعارضة اللي عم بتخمخم برا البلد .
... عرفت ياجار عرفت .. ومع كل هيك مابيدوروا ع اللي كانوا عم يدللوه ويحموه ويفتحولوا الأبواب .. مع انهم أساس البلا الأزرق والتخريب واللي ما عندهم شغلة إلا إذا سمعوا صوت شريف بيحاولوا يسكتوه .
- والله الحق معك يابو يوسف .. والله شي بيحير .. طيب مين المدعوم .. مش الحرامية والفاسدين بس لأنو الشرفا مابيمسحوا جوخ وبيدوروا ع الدعم .. الشريف بيموت من الجوع ولا بيوطيها لحدا في العالم .. وبالطبع ماحدا بيدور ع الشريف لأنو الشباب عندهم قاعدة بتقول ( اللي مابيبكي على أمه مابترضعوا تلات رضعات مشبعات ) ..؟ . هيك عيني عينك .. يعني بصراحة لما بترفع صوتك وبتهاجم الفاسدين والخونة وكأنك داخل بحرب مع الماسونية ..مابتعرف من وين بيجيلك الضرب والأذى ووين مارحت مابتشوف إلا اللي عم يزورك بعين حمرا متل قفا القرد .. يعني بصراحة إنو الفاسدين انضموا أوتوماتيكيا ً للحركة الماسونية واللي ماعجبه منهم يروح يشرب البحر . ولك والله اشتهيت شوف مسؤول شريف أو مواطن شريف مدعومين .. ولك يا جماعة فورا ً بيخلقوا لهم ألف تهمة وتهمة وبيشوهوا صورتهم منشان يخلصوا منهم .. ولك والله صار الشرف تهمة يحاسب عليها .. صحيح القانون مافيه عقوبة ع الشرف .. بس والله عندهم قدرة يقلبوا الأسود أبيض والأبيض أسود .

ولك آآآآخ ياولاد الأنغال آآآآخ .. لابد إلا مايصحى صاحب العجل ويتفرغ لكم وبعدها لكل حادث حديث ..
( علق بو يوسف قائلا ً ) أنا شايف إنك عصبت أكتر مني وبكرا بيسألوك وبيحاسبوك على هالكلام .. !!
- بسيطة يابو يوسف كل مين بدو يسأل ويحاسب ويظهر انزعاجه أو يحاول أن يفبرك لي قصة .. بيكون ماسوني ابن ستين ألف نغل ولن أقول الكلب لأن الكلاب مشهورة بالوفاء وهؤلاء خونة ..غدارين أفاعي أولاد أفاعي بيقرصوا وبيضخوا السم وبيتخبوا .. وماعندي غير من هيك كلام . واللي برجليهم يحطوه بروسهم .. ولابد مانتحاسب ولن ننسى الصغيرة قبل الكبيرة .
- أوف يااااه شي بيخلي الواحد يكفر بكل شيء .