دخيلك يا أستاذ قضيتي عويصة وقد قالولي ..بدها واحد قبضاي ..واصل .. ( إيدو طايلة ) .
- إنت َ بس احكي لي قصتك ثم اتركها علي وأنا (بحلها) ولا يهنك .
يبتلع الزبون لعابه .. يلعق شفتيه .. يبدأ بالتقاط أنفاسه ثم يبدأ بسرد قصته .. في هذا الوقت يمكنك أن تلتقط لمعان يبرق بين الفينة والأخرى في عيني الأستاذ .. يطمئن إلى أن الضحية قد وقعت في شباكه .. يلتفت إلى زميله أو مرافقه أو سمساره قائلا ً : بسيطة قضيته عند القاضي ( فلان ) ..هو..هووووه .. هذا ( زلمتنا ) ولايهمك . . روح وقع الوكالة وبعدين منشوف ..؟!!
... تذهب الضحية ..توقع الوكالة ..ثم يعود إلى المكتب الذي أشار عليه به ذلك السمسار .
تبدأ حفلة ( القصابة ) يعلق الزبون من قدميه ويباشر بتنفيض جيوبه .. شوف
يا أخونا .. أنا ( استغفر الله من كلمة أنا ) عادة لا أبدأ بالكتابة في مثل هذه الحالة قبل أن أقبض خمسون ألف ليرة على الأقل .. ولكن كرمال ( أبو الزوز ) بيكفيني مبدأيا ً خمسة وعشرون ألف ليرة .. يغمز بطرف عينه إلى السمسار أبو الزوز .. ومعلومك يا أخينا بدنا نعزم القاضي على حفلة غداء أو عشاء وما يتخللها من مشروب .. الويسكي غالي يا غالي .. ةصاحبنا مفطوم على البلاك .. /هذه يقولها بعصبية وكأنه يستنكر مثل هذا السلوك لكنه مرغم عليه بحسب مايوحي به / وبعدها عندنا جلسات بدها رش ورشرشة هون وهونيك .. وفنجان قهوة هون .. وسكره هناك ..الخ ..بسلامة معرفتك ..؟!! يغمغم الزبون
موافقا ً ..مستسلما ً ..مغلوبا ً على أمره ( وقع وماحدش سمى عليه ) . . أمرنا لله ..تكرم .. تكرم يا أستاذ . . بس سؤال صغير .. كم من الوقت وتنهي لي الأمر .
..يجيب الأستاذ مستنكرا ً .. له .له .له .. ( هاي ماحبيتها منك ) .. ولك ياعمي إذا عصلج معي القاضي .. بسيطة ..منشوف رئيسه ..ويمكن وزير العدل .. شوف يا أخي .. أنا ما بحب الفشخرة .. بس تأكد إن أي شخصية بالدولة ( منخبط بابها ومنفوت ) .. حط إيدك على أي مسؤول واسألني عنه .. بيطلع صاحبي ومتغدين سوا كثير . . روح ولا يهمك .. بس اترك لي رقم الموبايل .
نصيحة مجانية لوجه الله .. هكذا متأستذ .. كذاب وفاضي وابن ستين ألف كلب ولابيعرف قاضي ولا من يحزنون .. ولا أي مسؤول صغير أو كبير .. هيك أستاذ نصاب كبير حتى أنه لايفهم القانون الذي يتعامل معه .. أمثاله من يشوهون سمعة القضاء ويقدمون صورة منحرفة ومحرفة عن العدالة والقانون .. هؤلاء لالزوم لهم أبدا ً ولا يؤتمنون على قضاياكم .. والأفضل أن تحلقوا لهم قبل ماينتفوكم نتفا ً .. بس بتعرفوا إنو الحق مش عليهم .. الحق على النقابة اللي بتعرف هيك سلوكيات وما بتكافحها وتطرد هيك نصابين من النقابة ....كانت النصيحة بجمل ..واليوم أاوكازيون ببلاش . وعقلك في راسك بتعرف خلاصك .. ولا تنخدعوا بهيك كلام .. سامحونا .
أدخل كلمات البحث واضغط على إدخال.
تعليقات حول الموضوع
لإرسال تعليق,الرجاء تعبئة الحقول التالية