صباح الخير .. مازن كم الماز

ما لي عرفان شو قول , الحقيقة صار الكلام كله تقريبا ما بينحكى , بس بيجوز صباح الخير معقول تمرق , حتى صباح الخير لازم تتأكد إنك عم تقولها في الوقت و المكان المناسبين , يعني مو القصة تقولها الصبح , بس ما تقولها لمين ما كان , يعني قولها إذا بدك لأخوك , بس دير بالك تقول أكثر من صباح الخير , و لازم تقولها للشرطي اللي عندكم بالحارة و إلا ما يحكون صباحك خير بالمرة , و قولها لمختار الضيعة , و لأي مختار بتشوفه , بس لا تقولها لأي واحد بتشوفه , يعني شو بدك بالعالم و العالم شو بدها فيك , كل واحد مثلك عم يدور على شي صبح و السلام , ضرورية هلق صباح الخير , و لازم تعرف إنه صباحك على طول خير , يعني شو مو عاجبك صباحك ؟

يعني شو ناقصك دخيلك ؟ وقفت على صباح الخير ... و شو فيه زيادة بهذا الصباح يعني , ما أكلنا اللي في النصيب و طلعنا لنشوف شيء باص و لا شي ينركب , يعني من المركبات , لتذهب إلى عملك بكل نشاط , شو يعني ايمتى بتكون نشيط , يعني لازم نسكافه , شو كل شي بتشوفه بالتلفزيون بتحسب إنو لازم تاكله ولا ... يعني مو ناقص غير تقول بدي سيارة , و لا المصيبة تقول بدي احكي و ما بعرف شو , قلنالك اصطبح و قول صباح الخير ... سد فمك , خلصنا , وصلنا , اتطلع وراك يعني مرقت , نفدت يا أخو ال... , صباح الخير عن جد هالمرة