" عودة " الأصيل.. محمد عبده العباسى

شعر من العامية المصرية

تعب الجدع م الشيل
تعب الجدع م الحط
اتهد منه الحيل
ماوصلش يوم ولا شط
ولا رسم فى ورق
حرف كمان ولا خط ..
لا حد سأل ماله
ولا حتى كيف حاله ..
كفياه ياولداه
إن حياته نط ..
عجبى ..
وراح ف غمضة عين
ما حد قال على فين
ولا هوه فين الشط..
كل الأكادة
إن كان نفسه ف يوم يرتاح
ويعيش ضميره حى
ويصحى كل صباح
ويتكل ع الحى ..
عجبى ..
وكل يوم بتهده
رياح وزوابع
وهوه ما يوم شبع
وعمره ماقال جائع
عجبى ..
عجبى عليك يازمن
ما اديته ساعة براح
يمدد فيها جسمه
ولا حتى يوم ارتاح
من الشقا اليومى
كل مسا وصباح
وشغل هد قواه
ما فى يوم فرغ ساعة
ولعب فيها " الكومى "..
عجبى ..
من يوم ما أنا عرفته
وشفته يوم صدفة
وهوه شايل همومه
على كتفه طول يومه
ساعى بيطحن طحن
وما تم له يوم لحن ..
ساعى ورا اللقمة
لأجل " خوات " مساكين
سعدية ومطاوع
وتالتهم أبوه سماعين
وأمه " عيوشة "
عايشة مدووشة
بتنتظر " عودة " ..
وعودة دا مسكين
يلاحق مين ولا مين ؟
وراضى بالعيشة ..
عجبى ..
يخرج ف كل صباح
قاصد باب رب كريم
مع كل طلعة شمس
يهمس لربه همس
يارب ياعالم
عليك رامى همومى
ورزقى اليومى
اكفينى شر الناس
ولا ف يوم أنداس
تحت عرباتهم
قادر يارب حليم ..
عجبى ..
عجبى عليه يا خى
وهوه رايح جاى
لا ف يوم واحد فاتهم
ولا ف يوم كمان سابهم
وف كل ساعة جد
ألقاه ف أول صف
ماسك سلاحه أمين ..
عجبى ..
جدع وملو الهدوم
كتفه مامال بهموم
عمره مافرح ذات يوم
وكل يوم ينجرح
من خلق هما السو
مايعرفوش إنه يوم
كان هوه أكبرعو
لكنها الأيام
خلت قليل الأصل
يطير ويأكل الجو ..
وعجبى ..
--------