أسسها فتحي ابراهيم بيوض عام 2005- حمص

(نهاية العالم 21 / 12 / 2012 الساعة 12) ... محمد سنجر

مقالات وآراء | 2010-05-19 00:00:00


(طرقات قوية على باب غرفتي أيقظتني من نومي فزعا ،
انتفضت واقفا ، جريت أفتح الباب ،
و إذا بصديقي فؤاد يصرخ )
ـ أنت لسه نايم و الدنيا مقلوبة برة ؟
ـ خير ؟ فيه إيه ؟
ـ القيامة ها تقوم ، و أنت نايم لي في العسل ؟
( عندها لم أتمالك نفسي من الضحك )
ـ ههههه ، القيامة ها تقوم ؟
ـ أيوة ، شوف اللي مكتوب هنا في الجرنال ...
( ناولني الجريدة التي في يده ، أخذتها و ألقيت بها على الكرسي بجواري ، عدت متمددا على سريري ، سحبت غطائي فوقي )
ـ على فكرة ، أنا لسه مغير أنبوبة البوتوجاز ، ممكن تعمل لك كوباية شاي تفوقك شوية لغاية لما أقوم لك ، و فكرني أبقى أرد عليك...
( عندها سحب الغطاء من فوقي و أخذ يهزني و يصرخ )
ـ شاي إيه و بتاع إيه ؟ بأقول لك القيامة ها تقـــــــوم ، و أنت تقول لي اعمل لك شاي ؟؟؟؟؟
( عندها جلست متأففا )
ـ لا حول و لا قوة إلا بالله ، قيامة إيه يا أبني اللي ها تقوم ؟ أنت بتستهبل و إلا شارب شاي بلبن ع المسا ؟
ـ أهوه ، الجرنال هو اللي بيقول أهوه ....
( سحب الجريدة من على الكرسي و ناولنيها ، عندها أخذتها منه و طويتها و ألقيت بها بعيدا )
ـ و حياتك لو ميت جرنال ، أنا ما حدش يلعب بدماغي أبدا ، و بعدين ده الرسول ـ عليه الصلاة و السلام ـ بذات نفسه واحد سأله عن يوم القيامة و قال له ـ متى الساعة ؟ فقال له (ما المسؤول عنها بأعلم من السائل) ،
و الأهم من ميعاد يوم القيامة (ماذا أعددت لها) أو كما قال صلى الله عليه و سلم ، يعني الأهم من ميعاد يوم القيامة ، إنت عملت إيه ليوم القيامة ، و بعدين مين قال لك إنك ها تعيش أصلا لليوم ده ؟ مش ممكن تيجي شوطة تاخدك دلوقتي و أنت قاعد قدامي ؟ يا أبني ده كله كلام فارغ و بعدين ها أثبت لك علميا كمان ...
ـ تثبت لي إيه ؟ بأقول لك دي وكالة ناسا بنفسها هي اللي قالت الخبر ده ، و الناس دي طبعا ما بتهرجش ، و بعدين يا أخي ده المثل بيقول لك ـ لو اتنين قالوا لك فين راسك لازم تقف و تحسس عليها ....
ـ ده أنت و المغفلين اللي زيك اللي تحسسوا ، لكن أنا بقى ، لو العالم كله وقف و قال لي فين راسك ؟ ها أطلع لهم لساني ، ههههههههه ........
ـ يا سلاااااااااام ؟
ـ يا ابني الناس دي بتاكل عيش من ورا الإشاعات دي ، و عيب عليك لما تبقى راجل متعلم و تردد أي حاجة الأجانب يقولوها زي الأهبل كده لا مؤاخذة .
ـ و هو أنت خليت فيها لا مؤاخذة ؟ طب بس خد اقرا الموضوع ده لغاية لما أعمل لنا اتنين شاي ..
( ناولني الجريدة مرة أخرى و ذهب لعمل الشاي ، بينما أخذت أقرأ ما جاء في الجريدة ( نهاية العالم 2012) ،
بعد قليل جاء بالشاي و جلس إلى جواري )
ـ هيه ، عرفت بقى ؟
ـ عرفت إيه بس ؟ الخبر كله متفبرك و فيه كلام و لا يدخل دماغ عيل صغير في ابتدائي ، إلا صحيح ، هو انته كنت بتغيب في حصة العلوم و أنت صغير ؟
ـ أيوة ، بس أنت عرفت منين إن شاء الله ؟
ـ لأن الكلام اللي هنا ده مش ممكن يدخل دماغ واحد متعلم .
ـ ليه بقى إن شاء الله ؟
ـ بص يا سيدي ، لما حد يقول لك إن نهاية العالم ستكون يوم 21 / 12 / 2012 الساعة 12 و 21 دقيقة و 12 ثانية ، ده كله يبقى كلام فارغ لأن الحسابات دي مش موجودة غير عندنا على الأرض .
ـ مش فاهم .
ـ الحسابات دي يا ابني مش موجودة غير عندنا هنا على الأرض و بس ، يعني السنة اللي بنقسمها لاتناشر شهر دي مش موجودة غير عندنا إحنا هنا على الأرض ، و الشهر اللي بيتقسم لتلاتين أو واحد و تلاتين يوم ده مش موجود غير هنا ، و اليوم اللي بنقسمه لأربعة و عشرين ساعة برضه مش موجودة غير في حساباتنا احنا و بس .
ـ عروستي .
ـ أفهمها لك من ناحية تانية ، إنت تعرف مثلا إن اليوم على كوكب عطارد بيقسموه هناك لسنتين ؟
ـ إزاي بقى إن شاء الله ؟
ـ اليوم هناك بيساوي 176 يوم من أيامنا ...
ـ معقولة ؟
ـ طبعا و دي حاجة أي واحد ما كانش بيزوغ من حصة العلوم زي حضرتك لازم يكون عارفها ، يعني لو أنت عايش هناك كنت هتلاقي النهار 88 يوم و الليل 88 يوم ، و لو قعدت هناك يوم واحد يكون عدى عليك سنتين ، لأن السنة هناك بتساوي 88 يوم من أيامنا ...
ـ أنت دوختني كده .
ـ اللي أنا عاوزك تفهمه إن الحسابات دي بتاعتنا إحنا هنا بس على الأرض ، يعني ما تحسبش أي حاجة في الكون ده بحساباتنا إحنا ، و تشابه الأرقام اللي بيقولوه ده ما لوش أي منطق ، ثانيا تعالى هنا و شوف الخبر بيقول إن الموضوع ده اتسرب من وكالة ناسا ، و هو إنت فكرك إن وكالة ناسا دي زي وكالة البلح كده عندنا يتسرب منها أي خبر كده ببساطة ؟ بس اللي ألف الموضوع ده عاوز يحسس أنصاف المتعلمين اللي زيك كده إن الموضوع ده كان سر خطير و المفروض ما حدش من العالم التالت يعرفه ، و حلفت بقية الدول المتقدمة على المصحف إنها ما تجيبش سيرة لحد لغاية لما يتصرفوا ، بذمتك ده كلام يدخل دماغ ناس عاقلين برضه ؟
ـ طب و حكاية الكوكب اللي ها يقرب من الأرض ده ؟
ـ تعالى هنا و شوف الكدب اللي على أصوله ، بيقولوا هنا إنه ها يقرب من الأرض عام 2009 و ها يشوفه بتوع شرق أسيا ، طيب آدي ألفين و تسعة عدى و لا حد من بتوع شرق أسيا شافوا حاجة و لا يحزنون ، طبعا ها يقولوا إنه مر بالليل و أنت سيد العارفين إن الناس بتوع شرق آسيا دول بيناموا بدري عشان عندهم شغل الصبح ، ههههههههه .....
ـ بس بيقول لك هنا إنه ها يعترض مسار الأرض سنة 2011 و الناس كلها ها تشوفه زي الشمس .
ـ يعترض مسار الأرض إزاي و هما بيقولوا في آخر المقال هنا إنه بيدور حول الشمس في مدار يشبه مدار بقية كواكب المجموعة الشمسية ؟ مش كان أولى إن كوكب قريب مننا زي الزهرة أو المريخ إنه يعترض مسار الأرض ؟ و بعدين ما سألتش نفسك كده ، إشمعنى يعترض مدار الأرض دونا عن بقية كواكب المجموعة الشمسية ؟ هي غلاسة كده و خلاص ؟ يعني كان ممكن اللي ألف الموضوع ده يكون ناصح شوية لو قال إن فيه نيزك أو مذنب مثلا ها يضرب الأرض ، كانت ها تبقى مبلوعة شوية ، عشان النيزك مساره بيختلف عن مسار الكوكب ، زي نيزك توتاتيس مثلا أو مذنب زي هالي ، لكن كوكب له مسار حول الشمس زي بقية مسارات المجموعة الشمسية ، فده يبقى هبل في الجبل لا مؤاخذة ....
ـ هبل إيه ؟ شكلك أنت اللي مش فاهم ، ده بيقولوا إنه بياخد 4100 سنة على ما يلف حوالين الشمس لفة واحدة ، و ده كان السبب في انقراض الديناصورات من 4100 سنة ، و هو برضه اللي سبب انفصال القارات عن بعضها و اللي بيقولوا عليه الانفجار العظيم ....
( أخذت أضحك حتى استلقيت على قفاي ، عندها صرخ صديقي )
ـ بتضحك على إيه ؟ تلاتة بالله العظيم اللي يناقش معاك حاجة بعد كده يبقى غلطان و ابن ستين في سبعين ...
( هم صديقي بالانصراف غاضبا ، ذهب في اتجاه الباب ، إلا أنني جريت وراءه و أمسكت بالباب أمنعه من فتحه ، حاولت السيطرة على ضحكاتي حتى نجحت )
ـ بس تعالى بس أقول لك ...
ـ مش ها أتناقش معاك تاني ....
ـ خلاص بقى ، فيه ناس متابعينا دلوقتي و بيقروا اللي بنقوله ده ، خليني أكمل عشانهم طيب ....
ـ و أنا مالي و مال الناس ؟
ـ خلاص بقى عيب ، و آدي راسك ها أبوسها ، أنا آسف ....
ـ بس لو ضحكت تاني .....
ـ خلاص بقى ، أقعد الله يهديك ....
ـ أديني قعدت .
ـ بص بقى يا سيدي ، أولا الديناصورات دي انقرضت من 100 مليون سنة و بيتهيأ لي إنك ما كنتش بتزوغ كمان من حصة الحساب ، و لازم تكون عارف إن فيه فرق كبير قوي بين 4100 سنة و بين مائة مليون سنة ، 100 مليون سنة دي معناها واحد و قدامه تمان اصفار يعني 100,000,000 ،
أما انفصال القارات ده بقى فكان من قبل الديناصورات كمان بحوالي 500 مليون سنة ، و أما الانفجار العظيم ـ لو افترضنا جدلا إنه حصل و لو أنني أشك ـ فده بقى من 13 مليار سنة يعني 13 و قدامها تسع أصفار ، فمعنى إن واحد يدخل كل الحاجات دي مع بعض زي السلطة يبقى ده طباخ ممكن يشتغل في مطعم ، و بعدين وكالة ناسا أصلا كدبت الخبر و قالت إن ما فيش كوكب زي ده موجود من أساسه ...
ـ ما هو عشان يداروا خيبتهم قالوا كده ، و ده سبب ارتباك الحكومة الأمريكية و عشان كده قالوا إن اللي حصل ده خطأ علمي ؟ و بيحاولوا دلوقتي إنهم يكتشفوا كوكب تاني يشبه الأرض عشان ينقلوا الناس هناك ؟
( أحاول بصعوبة مسك ضحكاتي ، و أجبت )
ـ أيوة و عشان كده برضه أوباما زار الوطن العربي و بيحاول يصالحنا مع اسرائيل من باب إن الدنيا فانية و مش مستاهلة كل الخناقات دي ، و آدينا ها نروح كوكب تاني كبير و نبرطع فيه و كل واحد يعمل له هناك دولة براحته ، و من باب إننا ها نموت كلنا خلاص ، فلو كان هناك أحد بجانبك فلا تضيع الفرصة و عبر له عن حبك ؟ أنت بتتفرج على إعلانات كتير ؟
ـ يا بني دول هنا جايبين أراء ناس علماء زي واحد اسمه (نوستراداموس) سنة 1890و ......
ـ أولا (نوستراداموس) كان سنة 1503 مش 1890 ، ثانيا ده كان صيدلي و منجم ، و ده تنبأ إن العالم سينتهي عام 3797 يعني مش 2012 زي ما بيقولوا ، هو أي بدنجان و خلاص ؟
عارف مشكلتنا إيه ؟
ـ إيه ؟
ـ إننا بنجري ورا أي حاجة بيقولوها من غير ما نفكر بالعقل ، لأ و مش بس كده ، لأ ، هههه
( تأججت ضحكاتي التي كنت أحاول الإمساك بها ، فأطلقت لها العنان )
ده إحنا كمان بنحط عليها شوية ملح و فلفل عشان نقدر نبلعها و نستطعمها كمان ....
( عندها قام غاضبا و جرى إلى الباب يصرخ )
ـ بقى عاوزني أصدقك أنت و أكدب العلماء دول كلهم ؟ روح يا شيخ ، تلاتة بالله العظيم اللي عاد يتناقش معاك يبقى مجنون زيك .



كلمات دلالية:
التعليقات (0)

تعليقات حول الموضوع

لإرسال تعليق,الرجاء تعبئة الحقول التالية
*يستخدم لمنع الارسال الآلي
X :آخر الأخبار
دير الزور.. قتلى في قصف على البوكمال والتحالف يطالب النظام بالانسحاب من شرق الفرات      العاهل السعودي: المملكة ستدافع عن أراضيها ومنشآتها      المحكمة الرياضية توافق على تقليص عقوبة نيمار      قوات دولية كردية تشن حملة دهم واعتقال شرق الرقة      ريف حلب: مقتل طفل في "عفرين" وسقوط مصابين إثر اشتباكات عائلية في "الباب"      "فيسبوك" تزود منشئي المحتوى بأدوات جديدة عبر منصاتها      طهران تستضيف القمة الثلاثية السادسة حول سوريا      منتصف الشهر القادم.."غوغل" ستكشف عن هواتف Pixel 4