أدخل كلمات البحث واضغط على إدخال.

بالمشرمحي ...( سلوكيات 5 ..سرافيس وسيارات ..؟!! .. خليل صارم

السيد وزير الداخلية المحترم .. طالما إنكم تسهرون على راحة المواطن وأمنه .
/ بقى الله يخليك ويرحم أمواتك / عندنا /شوية/ طلبات لاتكلفكم شيئا ً .
1 - السرافيس وما أدراك مالسرافيس .. السائق يكون (مصطهج) تماما ًويمكن يكون مفول أو ضاربلوا شي دماغ / علي رأي الأخوة المصريين .. وفاتح المسجلة ع الأخير ومطربين من ماهب ودب .. شي بيجعر وشي بينهق وخبط ودق أشكال ألوان ..والسائق ناسي قدمه على الدواسة اللي لازقها بالصاج يعني ( ماإلو مروة يرفعها ) وهات ياتشفيط ويا وقوف مفاجيء تجعل الركاب يهتزون سبعة درجات على مقياس الأخ ريختر ... ولو أنكم جربتم ( هيك ركوب ) يمكن يكون هناك إحساس بالفرق .. لأن الوصف غير الفعل .. والتجريب غير الحكي . ( شو عليه إذا المسؤولين تواضعوا وجربوها واللا مش متل بقية خلق الله ) ..!!! .
يصرخ المواطن قائلا ً .. ياأخونا وقف ونزلنا على راحتك والأخ مش سامع ..دخيلك من وين بدو يسمع وكوكتيل النهيق والجعير والخبط والدق مابيخلي حدا يسمع .
2 - مابيكفينا الحالة العصبية اللي عايشها المواطن من البيت للدوائر الحكومية اللي عامله متل السيرك من موظفين ( وكل واحد عقله وفهمه للقوانين مختلف عن الآخر ).. للعجقة .. لللأسعار .. للضرائب اللي من كل طعم ولون .. الخ ..الخ .. بيقوم شوية أولاد صايعين ..بطرانين .. عم يتسلوا بالسيارات ورافعين أصوات المسجلات على خبط ودق .. تهتز معه الأرض والبنايات وبالليل يادادا بالليل . .
وما أدراك ما الليل وبلاوي الليل .. ولأنو طيبة الذكر شريفة فاضل طول عمرها بتغني الليل ..الليل .. وماعرفنا قصدها إلا بعد ماطلع عنا شوية عجول بطرانين وراكبين سيارات وفاتحين مسجلاتهم ع الأخير . ( ملعون أبو الحبحبة والبلبعة ويمكن الشم والمسمرة والصورخة ) على أبو الدعم والبطر على أبو أهاليهم مين ماكانوا يكونوا . ؟!!
- بقى الله يخليك .. وللتأكد .. نقترح عليك أن تلزم ضباط المرور ليوم واحد في الإسبوع أن يرتدوا اللباس المدني ويركبوا السرافيس في عز الزحام يعني مش يوم العطلة .. اعتبره يوم للتسلية لهم .. ويتجولوا في الشوارع نهارا ً وليلا ً .. وخاصة ليلا ً ليتأكدوا من تصرفات هالعجول المدللة اللي عم تتجول بسياراتها وأصوات مسجلاتها التي تقلق الأموات فكيف بنا الحال بالمرضى . ويمكن يكون بيناتهم من لايحمل إجازة سوق سيارة .. لأ وبيكملها راكبي الدراجات النارية اللي بيبخشوا الإشكمان حتى تكمل بجعير هذه الدراجات وسرعتها الخطرة .
وحجز كام سيارة وكام سرفيس وكام دراجة مع شوية غرامات وتوقيف إن كان ذلك قانونيا ً .. يمكن يربيهم شوي ويعلمهم الذوق واحترام مشاعر الآخرين . . ومعلومك إن القانون يتيح لكم ملاحقة المتسببين بالإزعاج واقلاق الراحة .. وهذا أضعف الإيمان .
يعني الله وكيلك الحالة مش مستحملة أكثر ومش ناقصة ثمن أدوية مهدئة ومنومة وأوجاع معدة وقلب وأعصاب وأرق وقلق ..الخ ..الخ وكمان الخ .. سامحونا . 

- kh.sarem@gmail.com

(8)    هل أعجبتك المقالة (5)
التعليقات (0)

تعليقات حول الموضوع

لإرسال تعليق,الرجاء تعبئة الحقول التالية
*يستخدم لمنع الارسال الآلي