رسالة من حسني مبارك إلى الشعب المصري ... احمد فؤاد نجم

يا شعبي حبيبي. يا روحي يا بيبي. يا حاطَّك في جيبي. يا بن الحلال

يا شعبي يا شاطر. يا جابر خواطر. يا ساكن مقابر. وشايل جبال

يا شعبي اللي نايم . وسارح وهايم. وفي الفقر عايم. وحاله ده حال

احبك محشش. مفرفش مطنش. ودايخ مدورخ. وآخر انسطال

احبك مكبّر . دماغك مخدّر. ممشي أمورك. كده باتكال

واحب اللي ينصب. واحب اللي يكدب. واحب اللي ينهب. ويسرق تلال

واحب اللي شايف. وعارف وخايف. وبالع لسانه. وكاتم ما قال

واحب اللي قافل. عيونه المغفل. واحب البهايم واحب البغال

واحب اللي راضي. واحب اللي فاضي. واحب اللي عايز. يربي العيال

واحب اللي يائس. واحب اللي بائس. واحب اللي محبط. وشايف محال

واحبك تسافر. وتبعد تهاجر. وتبعت فلوسك.دولار أو ريال

واحبك تطبّل. تهلّل تهبّل. عشان ماتش كوره. وفيلم ومقال

واحبك تأيد. تعضض تمجد. توافق تنافق. وتلحس نعال

تحضر نشادر .تجمع كوادر. تلمع تقمّع. تظبّط مجال

لكن لو تفكر. تخطط تقرر. تشغلِّي مخك. وتفتح جدال

وتبدأ تشاكل . وتعمل مشاكل. وتنكش مسائل. وتسأل سؤال

وعايز تنور. وعايز تطور. وتعملّي روحك. مفرد رجال

ساعتها ح جيبك. لا يمكن أسيبك. ورح تبقى عبره. وتصبح مثال

ح بهدل جنابك. واذلّ اللي جابك. وح يكون عذابك. ده فوق الاحتمال

وامرمط سعادتك. واهزّأ سيادتك. اخلّي كرامتك. في حالة هزال

وتلبس قضية. وتصبح رزيه. وباقي حياتك. تعيش في انعزال

ح تقبل ح حبك. ح ترفض ح لبّك. ح تطلع ح تنزل. ح جيبك جمال