القصة بدأت منذ عشرات السنين بعد إنتهاء أعمال مؤتمر أحد الأحزاب و إعلان أسماء الفائزين بعضوية المكتب السياسي و اللجنة المركزية
يجتمع أربعة من الرفاق في سهرة لمناقشة الأوضاع و نتائج المؤتمر يتخللها تدشين زجاجة عرق بيتوتي ساحلي مهداة من الرقيب الرفيق أبو مضر و بعد تاني كاس يجري الحوار التالي :
الأول : يا رفاق حاسس حالي ماني مرتاح لأوضاع الحزب الرجل المناسب ما عم يقعد على الكرسي المناسب
الثاني : إذا" من أجل الشعب و القضية لازم نجيب كراسي جديدة
الرابع : في صحة القضية والكراسي الجديدة
الأول : لاء يا رفيق الكراسي تعبير مجازي
الثالث : أنا فهمت عليك رفيق بس ما فينا نعمل شي راحت للمؤتمر القادم
الأول : لاء فينا نعمل و نعمل شو رأيكن ننشق عن الحزب ؟
الثالث : ننشق و منقعد بالبيت بلا شغل !!!!
الثاني : أنا برأي بنطالب بالكراسي الجديدة و بعدين بننشق و بناخد الكراسي الجديدة معنا
الرابع : في صحة ترك القضية على الواقف بلا كراسي
الأول : يا رفاق يا رفاق اطمنوا
رح ناخد الكراسي بس بطريقة شرعية
الثاني ( بصوت متقطع من كثرة الضحك) : بطريقة شرعية شو بدك تكتب كتابنا على الكراسي
الثالث ( و هو يحاول منع نفسه من الضحك) :
رفيق أنا ما بدي كرسي شرعي ممكن تكون حصتي طربيزة شرعية ( طاولة صغيرة )
الرابع : في صحة زواج طربيزة الجماهير
القضية صارت بلا كراسي و بلا طربيزات
الأول : يا رفاق بطريقة شرعية يعني ننشق و نعلن تشكيل حزب جديد
الثاني و الثالث بصوت واحد : حزب جديد ؟؟!!!
نحن الأربعة !!!!!!!!!!!!
رفيق هذا حزب مو لعبة تركس أو طرنيب ؟؟!!!!
الرابع : في صحة طرنيب الشعب
و هي طرنبنا القضية
الأول : يا رفاق مو مهم العدد المهم النوعية يعني بمعنى علمي مو مهم الكم المهم الكيف
الثاني و الثالث بلهجة واثقة : معك حق الشغلة بالكيف مو بالكم .
الأول موجها" حديثه للرابع رفيق ما سمعنا رأيك
الرابع : فعلا الأهم هو الكيف و نحن أسياد الكيف حشيش ع الآخر
في صحة كيف القضية و حشيش الجماهير
الثالث : رفيق كيف بدنا نشرح للجماهير موضوع انشقاقنا و تشكيلنا لحزب جديد
الأول : بسيطة بنكتب بيان منقول فيه ردا" على الزمرة المتخلفة المترهلة المتحجرة العميلة التي تخلت عن القضية
و تلبية لنداء الجماهير نعلن عن ولادة حزب الجماهير الجديد حزب الشباب حزب القضية
الثاني: نداء الجماهير ما سمعتن إمتى نادولنا ؟؟!!
الأول بلهجة صارمة غاضبة : رفيق ظبط بدلة أسنانك و خليلك عم تشرب عرق
الرابع : في صحة بدلات الأسنان و حزب الشباب
في صحة عرق الجماهير
.....................
و بعد مضي عدة سنوات صار لكورد سورية أكثر من ثلاثين تجمعا" ما بين أحزاب و حركات و تيارات و منظمات و أغلبهم و ليس كلهم يعتنق نظرية الكيف
قديما" قال الشاعر عبدالله كوران :
كوردي و كيس تبغ و حفنة زبيب فبندقية ثم صخرة و ليأت العالم و كل العالم
حديثا" :
كوردي و ثلاثة رفاق وكأس عرق ساحلي ثم نظرية الكيف فطرنيب القضية يؤدي لولادة حزب جديد !!!!
و أختم بسؤال يحيرني
هل القضية الأم لكورد سورية هي قضية مثمرة وولادة لهذه الدرجة ؟؟؟؟!!!
أم أننا لم نستطع حمايتها فاغتصبت عشرات المرات و أنجبت الكثير من الأولاد الغير شرعيين ؟؟؟!!!
ريزان حدو
تعليقات حول الموضوع
لإرسال تعليق,الرجاء تعبئة الحقول التالية