هوية منشقّة!... نذير جندلي الرفاعي

"أنا الضابط الفلاني، من مرتبات الكتيبة واللواء والفرقة، أعلن انشقاقي عن الجيش الأسدي وذلك بسبب تجاوزاته اللا إنسانية، وما فعله من قتل وتعذيب وتنكيل، وعدم رضوخه لمطالب الشعب السوري الأبي، كما وأعلن انضمامي لصفوف الجيش الحر، دفاعاً عن كلمة الحق، وحماية لثورته السلمية، والله على ما أقول شهيد.

خلصنا شباب.. شيلو اللاب توب من خلقتي، ورجّعوا العلم عالدرج، وشيلو كمان هالكاميرا من وجهي، رفعوه عاليوتيوب وخلونا نبعتو لهالكم قناة، خلونا نعرف نشتغل متل الخلق."

بعد سنة ونص.

• تحياتي سيدي..

* شو عندك يا ابني

• سيدي وصلت البضاعة من القيادة مشان نوصلها للجبهة

* اي روح حطهن بالمستودع وشوف فلان بركي منلاقيلن تصريفة نسترزق من وراها

• بس يا سيدي هدول للجبهة

* هههه، اي روح من خلقتي هلأ

• لك يا سيدي يستر عليك.. ما على أساس انشقيت!!

* اي طبعاً انشقيت، شو شايفني عم اشتغل مع النظام أو عم أسرق منو مثلا؟

«ياريتك حاربت معو، كان أفضل لنا»

ما جرى أعلاه ليس ضرباً من الجنون والخيال، بل هو للأسف واقع قلة قليلة ممن انشق وانضم للجيش الحر، وعمل على خلق "بروباغندا" إعلامية كبيرة تلميعاً لصورته، وخاصة بعد عمليات عسكرية إما وهمية، أو خالية من الأهمية.

أنا الشعب السوري، أعلن انشقاقي عن الفساد، وأعلن انتمائي لثورة الحرية والكرامة على كل من سوّلت له نفسه العبث بمصيري، وستتم محاسبته عاجلاً أم آجلاً، والله على ما أقول شهيد.