أمثَـــال العَوام في شهور العــام ... المهندس جورج فارس رباحية

كــــانــون

أبردْ من برْد كوانين ما في
أبرد ْمن طين كانون
إذا إجا عيد البربارة رُدّ البذار للكْوارة
بالبربارة الشموع نوَّارة
بالبربارة بتنقطِع الزيارة
بعيد البربارة بتطلع المي من وِكرْ الفارة ( 4 كانون أول )
بكانون الدنّوح على خيَّك لاتروح
بكانون حضِّرْ الفحم والكانون
بكانون كتِّرْ النار بالتَّنور
بكانون كِنْ ببيتك وكتِّر حطبَك وزيتَك
بكانون كِنْ وعلى الفقير حِنْ
بكانون كِنْ يامجنون
بين الدايم والغطاس بيت خيَّك ما بينداس (من 25ك1 ـ 6ك2 ) (من شدة البرْد)
خبيّ كام بارة للبربارة
شُقْ بكانون وتنّي بشباط بتربط الريّ بالأرض رباط
غرسة كانون أحسن من عمْنوَّل
كانون الأجردْ خلىّ الشجَر أمْــرَدْ
كل الشجر بيتعرّى بكانون إلاّ العفص والزينون
لاتغُرَّك صحوة كانون ولاغيمة شباط

شــــــباط

بشباط بيتدركَل البيض ع البْلاط
حلَف شباط وطلَّق ما يخلّي غسيل ع الحبْل معلَّق
راح شباط الغداَّر وإجا آدار الهدَّار
شباط بقول لآدار : ثلاتة منّك واربعة منّي لنخلّي العجوز تولّي
شباط بيضحك ع النسوان ( لأنهن ينشرن الثياب فإذا بالمطر يفاجئهن)
شباط عدوّ العجايز
شباط لو شبَّط ولبَّط ريحة الصيف فيه
شباط مافي على كلامو رْباط
شمس شباط بتسوّي الراس مثل المخباط
شمس شباط بتعلِّم ع البلآط
شمس شباط لكنَّاتي
الصيت لشباط والفعل لآدار
كل ساعة براي مثل شباط
اللّي ما بلمّ بشباط بلمّ عُراط ( ضراط)

آذار

إجا آدار وهدراتو علينا يا شباط عود
آدار أبو الزلازل والأمطار
آدار أبو القرصات الكبار
آدار الغدَّار
آدار حَبَلْ ونيسان سَبَلْ ( للقمح)
احتـجاب الشمس بآدار من نعايم الله الكِبار
بآدار استنّى سبع ثلجات كبار ما عدا الصغار
بآدار الدرْوة أحسَن من الفروة
بآدار بتتنقُل الشمس من برج الحوت وبتقول للبرْد موت
بآدار بْتِغلى المونه وبيكْتر النْقار
بآدار بشنهق الحمار
بآدار بمرّ الراعي ما بشوف باب الدار ( من شدّة المطر)
بآدار بيتساوى الليل والنهار
بآدار طالع بقراتك من الدار
بآدار طعمي الجَزَرْ للحمار ( يصبح قاسٍ)
خبيّ جمراتك ( فحماتك) الكبار لعمّك آدار
السّنة بآدارها إن اقبلت وراها آدار وإن أمحلِت وراها آدار
شمس آدار لكِنَّاتي
كل رعدة بآدار مطرة بنيسان
لبن آدار محرَّم ع الكفَّار ( يصادف وقت الصوم الكبير)
المصرة بآدار بتساوي مية دينار
مطر آدار يحيي الدّيار
المطر بآدار بينبت الزرع بين الحجار
ميِّة آدار بتحيي الزرع والأشجار
النصراني بموت وعينو بلبن آدار
هوا آدار بفتِّق الأشجار


نيســـان


بنيسان الحكم للنسوان
بنيسان السبلة بتشرب من تمّها
بنيسان طَفّي نارك وافتح باب دارك
شمس نيسان الي ولبناتي
كذبة أوّل نيسان
مطر نيسان بطوِّل الأشعار
مطر نيسان بيحيي قلب الآنسان
ميّة نيسان تحيي السكّة والفدَّان
نيسان بلا مطر متل عروس بلا جلي


أيَّــــــار


أيار شهر الأزهـــار
بأيار اسحب منجلك وغارْ
بأيار بتغنّي البلابل ع الاشجار
بأيار بيكبَر الخيـــار
بأيار قعود بين الورد واتذكَّر ليالي البَرْدْ
بَرْدْ أيار خراب للـــدْيار
بعشرة أيار خوخة وسبلة وزِرْ خيار
شمس أيار بتعلّم ع الحجار
مطرأيار بِيمَوِّن الفلاح بقراتو , وبتجوِّزلو أولادو وبناتو
المطرة بأيار لاتنفع ولاتضَّار



حزيـــران

بحزيران بتدخل الشمس برج السرطان وبتقول للحَرّ أهلاً بأعزّ الخُلاّن
بحزيران بتنزل الشمس وبيكبر الرُمَّــــان
تَعَبَك ع صوص حزيــران ما بيروح ضيعان
حَرّ حزيران بيعمل الحليب عيران
حزيران الهاوي وتمّوز الشاوي وآب الكاوي
حزيران بقلبو نيران
حزيران شهر الكيف أوِّلْتو ربيع وآخِرْتو صيف
حزيران فيه نيران


تمُّـــــوز

بتمّوز أكل الحماوي ما بيجوز
بتمّوز بتدفــى العجــــوز
بتمّوز بتغلي الميّ بالكوز
بعيد مار الياس حُطّ العنب للجُلاَّس (للضيوف) ( العيد في 20 تمّوز)


آب


آب اللّهّاب مابيهاب
آب بمَيِّع المسمار بالباب
آب طبَّاخ العنب والتين
إذا إجا آب الجـــوّ عاب
بآب ادخل الكَرْم ولاتْهاب
بآب اقطف العنقود ولاتستهاب
بآب فَوِّتْ الكُرّ لجُواَّت الدار
بآب لاتْحرِّك تراب
بعشرين آب ادخل الكرْم ولا تْهـــاب
بعيد الرب اللي بيتمشَّط بينتلي راسو حَبْ
بعيد الرب نقيّ حَبْ = =
بكل الشهور بينزل المطر إلاّ بشهر آب
زريعة آب للدَواب
عيد التجلّي بيقول للصيف وَليّ ( 6 آب )
عيد مار يوحنا حراَّق الدواليب ( 29 آب )

ايلــــول

إيلول دنبو مبلول
بإيلول مَوِّن عيالك وشيل الهَمْ عن بالك
بشهر ايلول دَبِّرْ المكيول للعدس والجمُّص والفول ( لقُرب أيام المونة)
بعد الصليب الآخراني صيف تاني
بعيد الصليب الدنيــا بتعيب ( 14 إيلول )
بعيد الصليب كل أخضر بيسيب
شعنن وادخل وصَلِّبْ واعبر
صَلَّبِتْ خرَّبِتْ ( أي بعد الصليب كل شيء يترك مهملاً في الكروم )
عنصِر واطلع وصلِّ وانزل ( أي انزل من على السطح )
عيِّد واطلع صَلِّبْ وانزل
في واحد وعشرين ايلول صحوة بلا غيوم
قمر ايلول صحوة بلا غيوم
مالك صيفية إلاّ بعد الصليبية


تشــريــن



أوَّل دخولو شمعة طولو ( يقال عند بدء شهر تشرين الثاني )
اذاخلص التين عليك بمية تشارين
بَرْدْ تشاريت أحدّ من السّكاكين
بَرْدْ تشارين تْوَقَّاه وبَرْدْ الربيع استلقاه
بَرْدْ تشرين بيهري المصارين
بين تشرين وتشرين صيف تاني
سبِّع بيتك قبل تشرين يامسكين ( طحين - سمن- زيت - دبس - برغل - خضار يابسة - شنكليش )
الصبيّة بتقول : بتشرين بكمِّل العشرين
عض على حيّة ولاتعضّ على خيارة تشرينبة
عيد مار ميخائيل مفتاح الشتا ( 8 تشرين الثاني )
اللي ما شبع عنب وتين بيشرب من ميّة تشارين

14/8/1995

ـ المصدر : كتاب أمثال حمص الشعبية : المهندس جورج فارس رباحية 2006