أدخل كلمات البحث واضغط على إدخال.

كرنك يخلع نظرية المؤامرة .. زهرمان البخاري

إنو والله صعبة الواحد عن شو بدو يكتب بعد هيثم المالح ويحافظ على نفس وتيرة تفاعل الجمهور،
اجيت بدي اكتب عن المناع أو ميشيل كيلو قلت هلق بيهرب نص الجمهور، رحت لاكتب عن العرعور والإخوان المسلمين قلت هلق بيهرب النص التاني وبقولو هالزهرمان وهابي وعندو أجنضة وفي مؤامرة.... وأنا لا أخفيكم متل ثوار هالفيسبوك، همي الشير والكومنتات ولايك الوجه الحسن،
بعد تفكير واعي وسبر عميق لبوستات الفيسبوك في الأيام الماضية ما طلع معي شي الصراحة غير موضوع مشترك بيناتنا كثوار ومنحبكجية وشعوب عربية وإسلامية وأجنبية وهو نظرية المؤامرة، لغاية إنو لا تجيب علبة الشامبو الكبيرة جيب الصغيرة لأنو بيعملوها أحسن مشان تعجبك وتجيب الكبيرة، لك خط انتاج طويل عريض لح يركبو واحد تاني حقو مدري كم مليون مشان يخوزقو الزبون!!
هلق ولع المنحبكجية بنظرية المؤامرة مالنا فيه لأنو أصبح مادة للكوميديا اليومية، بس ولع بعض الثوار بالنظرية ظاهرة تستحق الدرس والتمحيص والتدقيق والعناية،
إنو اغتالو خلية الأزمة ولكن!، لك قرايبينهن ليلي اتكلو رفقاتنا، يعني الخبر اليقين انو اغتالوهن، كانو عايشين وانفجرت قنبلة محل مو مجتمعين وماتو، بيجي واحد بنط بعلق عالخبر انو هذا يؤكد انو قاصف كان ميت من شهر وعملو هالاغتيال للتغطية على شي أكبر، وبروح بيسرح وبيمرح بالتحليلات وكلها مالها علاقة بالثورة ولا بالمشهد الاجمالي بل فقط كلام بلا طعمة وتفاصيل وإغراق بالتفاصيل، إلهي بيطلعلك المعلم بالمنام لابس مايو وبينقذك من التفاصيل يلي غرقان فيها وبيعملك تنفس اصطناعي.
أحلى الشي اليوم، انو انفجرت قنبلة بمبنى التلفزيون، والشباب راسهن وألف سيف انو هالتفجير مفتعل من النظام للتغطية على شي خبر ما، كأنو حدا مطشوش لإعلام النظام أو كأنو الاعلام العالمي انفلج بالخبروأحلى واحد يلي بيترك الدنيا وبحلل انو هالتفجير للتغطية على شي مجزرة ، إي وانت تقبر حالك شو عم تعمل؟ يعني ليش تركت المجازر وعم تتفهمن؟ ومين التهى بالتفجير غيرك؟
نظام صار يقصف مظاهرات بالطيارات، بحاجة لهل ألعاب الصبيانية ليغطي ويكشف وياخد برد؟ ولا نظام آمن وصدق إنو \"آساد إز ريلي دك\" هاد نظام بدو يعمل أفلمات وحركات ليشتت الانتباه؟
كرنك يخلعنا ما؟
طبعا غير الصفات الموروثة من 11 إيلول وإنو يا ترى في جماعات ارهابية ولا مافي؟ وفي قاعدة ولا مافي؟ وإنو هي من صنع النظام ولا أمريكا ولا اسرائيل ولا شو الترتيب؟ يعني يلي علقان هون بهالأسئلة بتوقع بحياتو ما بيقدر يطلع منها ولح يضل ماشي برحلة البحث عن الحقيقة يلي بحياتو مالح يلاقيها. يعني يلي كتير بياخد وبيعطي بهالقصص بحسو أجنبي، بحياتو ما بيعرف شو يعني مقاومة فلسطينية أو اسرائيل وليس احتلال العراق عنا ببعيد، يعني أوقات منحكي عن الارهاب متل التلفزيون السوري أو اذا مثقفين فمتل فوكس نيوز، وكأنو نحنا من عالم تاني ما منعرف التلفزيون السوري شو قصدو بالارهاب والاعلام الاجنباوي شو قصدو بالارهاب.
إنو يا أخي الثائر وأختي الثورة، ليش بتترك الظاهر لتروح للباطن؟ انو انت زكي؟ طيب.... مناف طلاس انشق ليستلم رئيس سورية يلي لح تختفي شوي تانية، وخلية الازمة انقتلت ليتخلصو منها لأنو كانت لح تنقلب على حالها، والتفجيرات تبع الميدان وكفرسوسة لكسب التعاطف الدولي يلي ما انكسب بحياتو، وجدي ما مات بل قتل مسموم قبل ست سنين مشان بس تصير الثورة ما يلعب دور بتسليح الحراك الشعبي، وستي صار معها رمل بالكلية مشان ما تطلع مظاهرات وتنشط الحراك السلمي.
بتوقع الشباب من كتر ما شافو محللين بهالثورة وانو شريف شحاطة عم يحلل، ولا أخفيكم لقب محلل لقب حلو، واللايكات أحلى وأحلى ويا ويلي على الشير شو بتعمل بالوجدان.
الله يوفقك إما تبنا نظرية المؤامرة بشكل كامل وعود هيك انسجلنا قصص عالمية عن المؤامرة الكونية، أو ريحنا من التفاصيل يلي مبنية على ملاحظات دقيقة جدا لواحد بحياتو ما شاف انفجار غير عالتلفزيون، من أخ لأخو...كرنك يخلعك لا كتير تسوق بمود التحليل، حاول تشوف الأمور الظاهرة والواضحة وبعد عن الغموض، يعني والله في من الأمور الواضحة ما يكفي لتكتب وتحكي وتنكت وتحلل كمان.

(27)    هل أعجبتك المقالة (24)
التعليقات (0)

تعليقات حول الموضوع

لإرسال تعليق,الرجاء تعبئة الحقول التالية
*يستخدم لمنع الارسال الآلي