اعتراف بارتكاب مجزرة مع سبق الاصرار والترصد... هبة حسن

أهلا حضرة الشرطي .... رح اعترف بكل شي ارتكبنا جريمة كلمة جريمة وصف قليل على اللي عملنا بحق الطفولة والأطفال والانسانية كلها
أنا رح احكي كل شي رح اعترف حضرة الشرطي مو الاعتراف بيريح الضمير نفسي ارتاح أنا من مبارح عم حاول نام وكل مااغفو دقيقة بيطلعلي كابوس بتزكر اللي صار بكل تفاصيله أنا كنت معهم خطوة خطوة ومع كل ضغطة على الزناد
قلت بطلع مشوار بلكي اتعب وانسى الصور وارجع نام ...
او على الأقل بخلي زوجي وبنتي يناموا ...
الدموع كانت تريحني زمان هلأ نار نار عم تحرق خدودي
فيك تقول عني اي شي فيك تقول جنيت بس ياريت جن انا عقلي اللي مجنني

- سيدتي أنا آوقفتك لأنك تقودين بسرعة جنونية رح تتفضلي معي على قسم الشرطة
انت عم تعرضي حياتك وحياة الناس للخطر !!!!!
خطر .... قلت لي خطر ...
لاتقاطعني اسكت بس خلص كلامي ... اعترافي بخليك تقرأ كل حقوقي بعرفها أصلا مافي داعي ......
- أنا أم من حمص كنت نايمة وقبل مانام كنت فكر بشو بدي أطبخ بكرة وخصوصا انو مافي عنا غاز .... وولادي كمان كانوا نايمين وفجأة سمعنا صوت رصاص خلعوا باب البيت قبل ماقوم عن سريري فتحوا باب غرفة نومي وقبل ماحط غطا راسي سمعت صوت رصاص ورصاصة رصاصتين صابوني براسي مدري ضليت عايشة مدري متت !!!
بس شفت حالي على السرير قصدي شفت جثتي على السرير غرقانة ببركة دم وعيوني مفنجلين بالقاتل لو فيه بسورية قسم تحقيق فيهم يطلعوا صورة القتل من عيوني هو آخر شي شفتو قبل ماموت
بس حكومتنا مابيهمها تحقيق ولابيهمها تحاكم أي قاتل بس بتوظف الجريمة ويتدين اللي على مزاجها
روحي ركضت بأقل من ثانية لغرفة ولادي لك اه ... اه ... ياريت الرصاص كان بقلبي بالطريق شفت زوجي غرقان بدمه على الأرض

كانت بنتي فايقة بتضل تخاف وتفيق بالليل وأنا قلها مافي شي يخوف ياماما !!! هي أصغر شي عندي عمرها ٥ سنين كانت طالعة من الحمام كان فيه مسلح تاني بالمممر مسكها وحط براسها كلاشنيكوف وكان عم يكبس الزناد ماقدرت اعمل شي يالله يالله بس لو لحظة بس لو ضلت بالحمام وماطلعت سمعتها عم تقول عمو ليش شو عملنا انت ماعندك ولاد ؟؟؟!!!
قتلوها ... ركضت لغرفة الولاد كان ابني لسه عم يفيق .... تجّلس على ركبه دخلت رصاصة من جنب عينه وطلعت هشمت راسه شفت مخه على المخدة وابني التاني كان لسه عم يفرك بعيونه عم يفيق رشة وحدة صلية وحدة وبعدين شفت المسلح قرب وقوس كمان منشان يتأكد
ابني كان خايف كتير ما يكتب منيح بالفحص نام وكتابه جنبه نام وهو عم يدرس
ايه هيك صار لك لا ماعم هلوس ولا متعاطية حبوب ولابشرب .... هيك أنا ..... حتى دوا الاكتئاب وقفته وفكرت حالي تعافيت
اعترفت بالجريمة شايف شو بشعة هالجريمة هي الصور كمان شايف بعرف انك مو مصدق ..... يالله الله يخليك كلبشني وخدني على قسم الشرطة بمكن اقدر نام هونيك
ولا تسألني عن الدافع ياترى شو بيكون دافع هيك جريمة
شوية مصاري اللي بيرتكب هيك جريمة مابدو دافع هو مو انسان مابعرف شو فيك تقول وحش

حتى الوحش بيقتل لياكل بس هيدا ليش بيقتل وبيدبح سألته حتى هو مارد ولاعطاني جواب مقنع

لازمنا حكم اعدام بتعرف بلامحاكمة ولا تقلي تمثيل للجريمة
عنا القتلة بيمثلوا بالجثث ماحدا بيمسكهم لحتى يعترفوا ويمثلوا الجريمة وطب شرعي ونفسي ودكتور نفسي يطلعنا مجايين وتودونا على مصح عقلي
هي كل شي الله قدرك عليه مخالفة روح الله يسامحك روح الله يسامحك والله ينتقم منهم ويجازيهم على كل قطرة دم وروح بريئة
مالنا غير الله شايف كل شي ومابينظلم عندو حدا