رسالة للمنحبكجي للشبيح للشرطي للجندي للمسلح

انت يامنحبكجي ياشبيح ... ياجندي ياشرطي يامسلح

شبك شو صايرلك

معقول هيك

والله حرام

مو نحنا اخوة

مو اخوة طيب جيران

ولاجيران !!!! مابكفي عشنا مع بعض بهالبلد وشمينا نسمة هواه وتمتعنا بخيراته وروينا بدمانا وبدموعنا ترابه

كيف هيك صرنا وليش ليش لحتى تقتل اخوك ليش لحتى تقتل اي حدا أصلا

فيه حدا غلط فيه محاكم شو صرنا عايشين بغاب

اختلفنا

مو بيقولوا مصارين المعدة بتتعارك

ليش مو حرام كل الألم والحزن مابيكفي

لسه مصدق انو مؤامرة متل ماحكى رئيسك

فيه حدا ممكن يضحي بحياته ويخاطر بحياة عائلته واطفاله وجيرانه حتى يشترك بمؤامرة من شان المصاري

وانت يلي قاعد بالدبابة وعم تقصف وكأنك عم تحرر فلسطين

وعم تهدم بيت سوري بكل قذيفة

بتعرف شو يعني بيت وبتعرف قديش تعب وحرم نفسه لحتى يعمر هالبيت

بتعرف قديش ادين وعمل جمعيات واشتغل بعد الدوام وباع دهب مرته وحرم عيلته واطفاله لحتى يصير عنده بيت

منشان المصاري عم تعمل هيك

وشو رح نعمل بالمصاري كانت من بره ولامن ولامن جوا

مو خربت البلد واللي ماخرب رح يخرب اذا ضلينا هيك

مايكفي كل اللي صار لحتى الواحد يوقف ويتأمل ويعيد كل حساباته

لو ين رايحين

وشو رح نترك لولادنا

كل هاد منشان رئيس نظام ملزق بكرسيه عم يعمل اصلاح ... كذاب كلو حكي وعلاك لو صادق كان افرج عن المعتقلين وعمل دستور متل الخلق والعالم

دستور بيكفل حقوق الجميع ... بيسمح بتداول السلطة وبيفصل بين السلطات وبيحقق استقلال القضاء لنصير كلنا تحت سلطته


هيك البلد من زمان مابيلبقنا عم تقول ...... عم تقول هادا واقع .... واذا مو مستحيل نغيره

لما يستقل القضاء بيضمن حقوقنا كلنا


والنظام مابدو استقلال قضاء ولابدو نزاهة قضاء بدو قضاء يديره وقف مصالحه ومزاجه

فيه بلد بالعالم الرئيس سلطته اعلى من سلطة القضاء

بشار عم يكزب

انت نفسك يامؤيد يامنحبكجي ياشبيح يابطل بتعرف انو عم يكزب

عاجبتك حياتك

عاجبك هالنظام

عاجبك هالفساد والاحتكار

بدك تضل عايش ببلد بيحكمها ناس بمزاجهن لاذمة ولاضمير ولا أخلاق

ماسألت حالك ليش هالجيش ماتحرك من ٤٠ سنة وبس قال الشعب لا ملأ الشوارع والساحات وهد البيوت والحارات

كل شعوب العالم بتقول لا

كل الشعوب بتختلف ويتتصارع ويتنتخب وبتقرر بالاجماع بالاكثرية

مابدك تكون مواطن في دولة عصرية

تكفل حقوقك وتأمن لك العدالة والمساواة

مامليت من بوس الصرامي وتمسيح الجوخ ودفع الرشاوي للضباط

مابدك تحط بكل دائرة رسمية صندوق شكاوي ومقترحات بدل صندوق الرشاوي والمقترحات

اذا انت مستفيد وامورك ماشية وعم تجمع مصاري

وماهامك شي

صدقني مارح تتمتع بقرش واحد

البلد ماشية للهاوية لطريق خطر ووعر

واللي عم يموتوا وانت عم تستهدفهم برصاصك لحتى تنهي المظاهرات

الهم اهل الهم اخوة وواباء وأمهات وزوجات وابناء

رح يكبروا

ورح ياخدوا بتارهم مارح يضلوا حاطين الحزن بالجرن وقاعدين يبكوا ويتسحروا

هيك بدكن وهيك بدو معلمكم بشار

ومفكر لو كسب على المدى القصير رح يربح على المدى الطويل

فيه حرب جاية حرب بين شرائح مجتمعنا واطيافه

نار عم تكبر ورح تحرق منا الكبير قبل الصغير

ولازم ناخد القرار بيكفي قتل وألم ودمار

فيه أخطار كبيرة ودول وأنظمة في صراع وبدها ساحة لتتصارع وتصفي حساباتها

دول مابيهمها الا المصالح

ومصالح بلدك سورية مابتهم حدا لازم تهمك انت لان فيها عايش وانشالله رح يعيشوا ولادك
اذا ماقتلت حدا واذا قتلت رح تتحاسب رح يحاسبك الشعب ورح يحاسبك ربنا

لان مافي جريمة بلاعقاب

شريكتك بالوطن هبة حسن