رسالة من طفلة سورية لأبيها
.... : بابا كيفك أنا بخير انت طمني عنك ... بطلت نام أو إلعب الضهر منشان لو
أخدنا املاء إلحق اتدرب عليها على ضو ربنا لأن ضو الكهربا عم يقطع وبتعرف الدني
شتي وعم تعتم بكير وعم نغيب عن المدرسة كتير والمعلمة آكلة همنا كتير وكيف بدا
تخلص المنهاج ... طريق المدرسة صاير بيخوف كتير عم نشوف باصات وسيارات ودبابات
مليانة عساكر وعم تمشي بسرعة وفيه ناس عم تموت على الطريق مابعرف شو بدي قلك بس
انت قلتلي انو ضل ماسكة ايد اخي ومااتركها ابدا بس بلكي متت أنا أو أخي مو لازم
نترك ايدين بعض لان لو حملته هو مافيه يحملني .. والله مابعرف وين بدي ابعتلك
هالرسالة لأن قالولي أنك متت بس انا ماصدقتون سلام يابابا ناطرين ترجع باي
2
رسالة من طفلة سورية لأبيها 2 : هي رسالة تانية بابا
مابعرف كيف بدها توصلك .... بابا كان جاي عبالنا طبخة مفركة بطاطا ..... فيه بصل
... بس الماما مابدا تطبخ اليوم مفركة بطاطا لأن مافي بطاطا ومافي نص أوقية لحمة
بالبراد لأن الكهربا مقطوعة وسمنة يمكن مافي ولاحتى زيت ومافي كمان غاز ... ماما
عم تروح وتيجي من الضهر ومو عارفة شو بدها تعمل ... وأنا جوعانة كتير بس ماقلت لها
لأن بعرف أنو مو طالع بإيدها شي ... بس بدي قلك انو رئيسنا بشار كزاب أيه كزاب كل
يوم بيقول خلصت ومافي شي خلص غير المونة إنشالله تخلص روحه ونرتاح منه ومن كزبه
يابابا !!!! نسيت قلك خبز كمان مافي عنا باي انشالله نشوفك عن قريب يابابا
3
رسالة من طفلة سورية لأبيها ( 3) : جابوا جثة علي
بيتنا ... يعني واحد ميت .. هو صحيح بيشبهك ولابس نفس تيابك .. بس ... غرقان بالدم
.. معقول شو بيشبهك بابا .. بس مو مبينة ملامح وجهه منيح .. مستحيل تكون انت ...
أنا ... مابكيت ضليت أتطلع فيهون وقلهم انتو غلطانيين اجو الكل قرايبنا والجيران
كان الكل عم يبكي وأنا قلهم واضحك ... هيدا مو بابا صاروا يقرأوا علي المعوذات
ويضموني ويبكوا .. بابا اللي بيموت معقول يتغير شكله هيك أكيد لأ .... ملاحظة:
المعلمة شافت هي الرسالة كنت لسه ماشقيتها من الدفتر ضمتني وغرقتني بالدموع ...
بابا بصراحة خايفة كتير تكون انت ... بس انت حباب عمرك ماأذيت حدا أو تخانقت مع
حدا حتى يأذيك كيف لحتى يقتلك ... بابا عم نستناك ... ولايهمك تأخر والله رح نصير
أنا أخي عاقلين منشان ماتضوج ، بس لازم تيجي بالآخر ... إذا مو منشاني منشان ماما
وأخي مشتاقينلك كتير كتير ... وبتعرف شو كمان .... منشان مايقولوا عني كزابة ....
باي بابا ... بنتك .... المشتاقة كتير كتير ....
4
رسالة من طفلة لأبيها ( 4) : ستي قالتلي انك راجع
وانها عم تشوفك بوجه كل متظاهر وعم تسمع صوتك مع كل صرخة حرية ..... مافهمت كيف بس
قالتلي اني بس أكبر رح افهم مو مهم اذا فهمت أو لأ المهم ترجع يابا ..... ستي
الوحيدة اللي صدقتني وقالتلي انك راجع ... بس ليش عم تبكي مابعرف .... ولما سألتها
... صارت تبكي وماعدت فهمت عليها شي ...... ايه صحيح .... مبارح بس دق الباب عرفت
انو هيدا انت ... ... فتحت ماما الباب لقيت الأغراض اللي جبتون .. كيس رز وكيس سكر
وتنكة سمنة وكيس طحين ومصاري ... قلت لهم شفتوا كيف هيدول الغراض بابا حطون وراح
لأنو مستعجل .ليش رحت بسرعة كنت بدي ألحقك بس ماما ماخلتني ..قلت لأمي شفتي كيف
بابا بعدو عايش شكرا ياأحلى اب بالعالم ملاحظة : تاني مرة بس تيجي خلينا نشوفك ولو
حتى دقيقة واذا كنا نايمين مو مشكلة فيقنا لاتخاف ... مافي مدرسة هالايام ... بنتك
المشتاقة كتير كتير
رسالة من طفلة سورية لأبيها (5): بابا طولت الغيبة
كتير ... اجوا شباب وقالوا لجدو أنو عمو معتقل في فرع أمن الدولة اللي بكفر سوسة
راحت ماما وجدو وستي لحتى يسألوا عنو أخدو سيارة أجرة وراحوا ... راحو من الصبح
بكير منشان يرجعوا يلحقوا يعملوا غدا بس تأخروا كتير مارجعوا والمسا اجت خالتي
أخدتنا أنا وأخي وقالتنا إنهم راحوا لعندك .... بابا خالتي عم تبكي كتير وماعم
ترضى تقول شو القصة أو شو صار خالتي من يوم رجعت ماعادت حكت شي أبدا ولا أكلت
ولاشربت وماوقفت عن البكي ... بابا خدنا كرمال الله لعندك والله مشتاقينلك كتير
كتير .... بنتك
عندما تقرأ هذه الرسائل من الطبيعي أن تبكي وتحرق
خديك دموع دافئة ستشعر بحرارتها للمرة الأولى ربما ... وان لم تبكي أو يهرب من
عينيك ولو حتى دمعة واحدة فأنت حتما لم تقرأ جيدا ولم تفهم ... الحزن عندما يتسلل
لخواطرنا مع أول حرف من حروف هذه الرسالة فهو دليل على انسانيتنا .. دليل على أننا
لازلنا أحياء لازلنا نحس ونشعر
.....
هذه الكلمات قرأتها في ملامح طفلة اسمها كنانة من
الوعر حمص فقدت والدها حيث قتل برصاصة أثناء عودته لمنزله
من بنت شهيد لأبيها .... هبة حسن
زمان الوصل
تعليقات حول الموضوع
لإرسال تعليق,الرجاء تعبئة الحقول التالية